ދިވެހި ތާރީޚުން އެނގިފައިވާ ގޮތުގައި އެކިފަހަރު މަތިން ބާޣީންވަނީ ރާއްޖެ
އަޅުވެތި ކުރުމަށްޓަކައި ރާއްޖޭގެ ފަސްގަނޑުގައި ފައިހަރުކުރަން މަސައްކަތް
ކޮށްފައެވެ. މިފަދަ ކޮންމެ ދަނޑިވަޅެއްގައިވެސް ދިވެހި އަގުހުރި ދަރީންތަކެއް
ޖިހާދުގެ ކަމަރު ބަންނަވައި ދިވެހި ޤައުމާއި ދީން ހިމާޔަތްކުރުމުގައި
ޝަހީދުވެފައެވެ. ޢަލިރަސްގެފާނު ފަދަ ދިވެހި ބަޔަލުންގެ ނަންތަކަކީ ދިވެހި ދީބުން
ފަނޑުވެގެން ދާނޭ ނަންތަކެއް ނޫނެވެ. އެބޭކަލުންގެ މަތިވެރި ޤުރުބާނީގެ އަގު
ވަޒަންކޮށް، އެބޭކަލުންގެ ހަޔާތުން ޢިބުރަތް ލިބިގަނެ ޤައުމަށްޓަކައި ޖާނު
ފިދާކޮށްލުމުގެ މަތިވެރި ޢަޒުމު ހިތުގައި ހަރުލެއްވުމަށްތަކައި، މިފަދަ ލާމަސީލު
ބަޠަލުންގެ ޒިކުރާ އަޅުގަނޑުމެން ދިވެހީން އާކުރަންޖެހެއެވެ.
ދިވެހި އުއްމަތް އިސްލާމް ކަންމަތީ ދެމި އޮތުމުގައި ދިވެހި ޤައުމަށްޓަކައި ލޭ
އޮހޮރުވާލި ޝަހީދުންގެ ދައުރު ވަރަށްވެސް ބޮޑެވެ. އެބޭކަލުންގެ ޖިހާދުގެ މައިގަނޑު
އެއް މަޤަސަދަކަށް ހައްދަވާފައިވަނީ ދިވެހިންގެ ދީން ޙިމާޔަތްކުރުމެވެ. ބާޣީން
ދިވެހި ޤައުމަށް އަރައި، ދިވެހިން އަޅުވެތިކޮށް، ދިވެހިންނަށް ރާ ބޯންދީ
ދިވެހީންގެ ދީން ބަދަލުކުރަމުން ދިޔަ މަންޒަރު ބަލަން ނުތިބެ މި ލާމަސީލު ދިވެހި
ދަރީންތައް ވަނީ ދިވެހި ދީން ހިމާޔަތް ކުރުމަށްޓަކައި ފުރާނަ ދުއްވައިލާފައެވެ.
އެހެންކަމުން މިފަދަ ޤައުމީ އަބްޠާލުންގެ ޒިކުރާ އާކުރަނޖެހޭ އެއްސަބަބަކީ
ދިވެހީންގެ ދީން ހިމާޔަތް ކޮށްދީފައިވުމެވެ.
ދިވެހި ދީން ހިމާޔަތް ކުރުމާއެކު،ޝަހީދުންވަނީ ދިވެހި ޤައުމުވެސް ހިމާޔަތް
ކޮށްދީފައެވެ. ދިވެހި ދަރީން އަޅުވެތިވިޔަ ނުދީ، ދިވެހި ޤައުމު އަޅުވެތިކަމުގެ
އަނދިރިގަނޑުގެ ތެރެއަށް ވެއްޓުނަ ނުދީ ސަލާމަތް ކޮށްދެއްވާފައިއެވެ. ދިވެހިންގެ
އަރުތެރޭގައި ހިތިރަހަ ލެއްވިޔަ ނުދީ، ދިވެހި ޤައުމު ޙިމާޔަތް ކޮށްފައިވުމީވެސް
ދިވެހި ޤައުމީ އަބްޠާލުންގެ ޒިކުރާ އާކުރަންޖެހޭ ސަބަބެއް ނޫންތޯއެވެ؟
އެއްވެސް ޝައްކެއް ނެތް ގޮތުގައި ދިވެހި އެއްވެސް ދަރިއެއް އަޅުވެތިކަމުގައި
ހަޔާތް ވޭތުކުރާކަށް ބޭނުމެއް ނުވާނެއެވެ. ނަމަވެސް ދިވެހި ދަރީންތަކެއް ވަނީ އަޅުވެތިކަމުގެ
ނާމާން ދުވަސްތަކަކާވެސް ކުރިމަތިލާފައެވެ. މި ނާމާންކަމާއި ބިރުވެރިކަމުން
ދިވެހީން ސަލާމަތްކޮށްދީ ދިވެހިންނަށް މިނިވަންކަމުގެ މީރު ފޮނިކަން ލިއްބައިދިނީ
އަގުހުރި ދިވެހި ބަޠަލުންތަކެކެވެ. މިއަދާ ހަމައަށްވެސް މިޤައުމު މިނިވަންކަންމަތީ
ދެމިއޮތުމުގެ އަސްލަކީ އެބޭކަލުންގެ އަގުހުރި ޖިހާދެވެ. ދިވެހިންނަށް މިނިވަންކަން
ހޯއްދަވައި ދެއްވުމީ ދިވެހި ޤައުމީ ބަޠަލުންގެ ޒިކުރާ އާކުރަންޖެހޭ މައިގަނޑު
ސަބަބެވެ.
ކޮންމެ ޒަމާނެއްގައިވެސް ކޮންމެ ހިނދެއްގައިވެސް ދިވެހި ޤައުމާއި ދީން
ހިމާޔަތްކޮށް، ދިވެހިންގެ މިނިވަން ކަމަށްޓަކައި ތިމާގެ މޭ އައްޑަނައަކަށް
ދިއްކޮށްލުމަށް ތައްޔާރަށް ތިބޭ ދިވެހި ދަރީންތަކަކަށް ދިވެހި ޤައުމު
ބޭނުންވެއެވެ. މިފަދަ ދަރީންތަކެއް އުފެދޭނީ ދިވެހި އަބްޠާލުންގެ ޒިކުރާ
އާކުރާކަމުގައި ވަނީނަމައެވެ. އެހެނީ ދިވެހި ގައުމަށްޓަކައި ފިދާވުމުގެ އަޒުމާއި
ހިތްވަރު ލިބިގަތުމަށްޓަކައި ޤައުމީ އަބުޠާލުންގެ ހަޔާތްޕުޅުތަކުން ޢިބުރަތާއި
ފިލާވަޅު ލިބިގަންނަން ޖެހެއެވެ. އެހެންކަމުން ދިވެހި އަބްޠާލުންގެ
ޙަޔާތްޕުޅުތަކުން ޢިބުރަތާއި ފިލާވަޅު ލިބިގަތުމަށްޓަކައި އެބޭކަލުންގެ ޒިކުރާ
އާކުރަން ޖެހެއެވެ.
ދިވެހި އަބުޠާލުންގެ މަތިވެރި ޤައުމީ ޚިދުމަތުގެ އަގު ވަޒަންކުރުމީ
ދިވެހީންގެ މައްޗަށް އޮތް ވާޖިބެކެވެ. ދިވެހި ޤައުމާއި ދީނަށްޓަކައި ފުރާނަ
ދުއްވާލުމީ ތެދުވެރި ދިވެހި ދަރިއަކަށް މެނުވީ ކުރެވޭނެ ކަމަކަށް ނުވާއިރު މިފަދަ
އިޚްލާސްތެރި ދިވެހި ދަރީންގެ މަތިވެރި ޚިދުމަތުގެ އަގު ވަޒަންކުރުމަށާއި
އެބޭކަލުންނަށް ޝުކުރުވެރިވުމުގެ ގޮތުން އެބޭކަލުންގެ ޒިކުރާ އާކޮށް
އެބޭކަލުންނަށް ހެޔޮ ރަޙްމަތް ލެއްވުމަށް އެދި ދުޢާކުރަން ޖެހެއެވެ.
ޝަހީދުންގެ ޒިކުރާއާއި އެ ހިތްވަރު އާކޮށް ޤައުމަށްތަކައި ޖާނުދޭން
ތައްޔާރަށް ތިބޭ ދިވެހި ދަރީންތަކަކަށް އަޅުގަނޑުމެން އެންމެހައި ދިވެހިން
ވަމާތޯއެވެ. ދިވެހި ޤައުމާއި ދީނަށްޓަކައި ޝަހީދުވުމަށް ފަސްނުޖެހޭ ބަޔަކު
ކަމުގައި އަޅުގަނޑުމެން ވަމާތޯއެވެ. ދިވެހި ޤައުމަށްޓަކައި ލޭ އޮހޮރުވާލި ދިވެހި
ލާމަސީލު ބަޠަލުންނަށް ﷲ ހެޔޮ ރަޙްމަތް ލައްވަވައި އެބޭކަލުންނަށް ސުވަރުގޭގެ މަތިވެރި
ދާއިމީ ނިޢްމަތް މިންވަރު ކޮށްދެއްވާށިއެވެ. އާމީން!
No comments :
Post a Comment