ޚިދުމަތްތެރި ދަރިއެއް

އެއްމެ ރީތި ކުލައަކީ ހުދުކުލަކަމަށް ބުނާ ހއ. އިހަވަންދޫ އާހިޔާ، އަޙްމަދު ރަޝީދު ނުވަތަ މަޝްހޫރު ނަމުން ނަމަ ދޮންބެ އަށް އެއްމެ މީރު ކެއުމަކީ ޤަރުދިޔައާއި ބަތާއި ލޮނުމިރުހެވެ. ދޮންބެ އަކީ ހއ. އިހަވަންދޫ ވެދުންގޭ ޖަމީލާ އާދަމާއި ހއ.ހޯރަފުށީ އަލަނާސިގޭ މުޙައްމަދު ޔޫސުފުގެ 7 ދަރިން ތެރެއިން 4 ވަނަ އަދި ހުރި ހަމައެކަނި ފިރިހެން ދަރިފުޅުވެސް މެއެވެ. ދޮންބެ ނިސްބަތްވެ ވަޑައިގަންނަވަނީ ކުންޑަ އާއިލާއަށާއި އަލިބެ އާދަނު އާއިލާއަށެވެ. 1974 ވަނަ އަހަރުގެ ފެބުރުއަރީ މަހުގެ 5 ވަނަ ދުވަހު އުފަންވެ ވަޑައިގެންނެވި ދޮންބެ އަކީ މަޖާ މިޒާޖެއްގެ އެންމެންނާވެސް ގުޅޭ ބޭފުޅެކެވެ.

ދޮންބެގެ ތަޢްލީމީ ޙަޔާތަށް ބަލައިލާއިރު، ދޮންބެ ވަނީ އިހަވަންދޫ މަދަރުސާއިން ގުރޭޑު 6 އަކާއި ހަމައަށް ކިޔަވާ ވިދާޅުވުމަށްފަހު މާލެ ވަޑައިގެން މަދަރުސަތުލް އަޙްމަދިއްޔާއިން ގުރޭޑު 10 ނިންމަވައި އޯލެވެލް އިމްތިޚާންވެސް ހައްދަވާފައެވެ. އޯލެވެލް އިމްތިޚާނުން އެއް މާއްދާ ފިޔަވައި އެހެން ހުރިހާ މާއްދާއަކުން ދޮންބެއަށް ލިބިވަޑައިގެން ކާމިޔާބީއެއް ގޮތުގައި އޭނާ ސިފަކުރައްވައެވެ. ސަބަބަކީ އެދުވަސްވަރު ދޮންބެ މަދަރުސަތުލް އަޙްމަދިއްޔާގައި ތަޢްލީމު ޙާސިލް ކުރައްވަމުން ގެންދެވީ އާއިލާގެ އެހީތެރިކަމެއްނެތި އެކަނިމާ އެކަނި ހިތްވަރު ކުރައްވައިގެން ކަމަށްވާތީއެވެ. އަދި ކިޔެވުމަށް ބޭނުންވާނެ ލާރިއާއި އެހެނިހެން ހަރަދުތައް ފުއްދުމަށްޓަކައި އެދުވަސްވަރު ދޮންބެ ވަނީ ތަފާތު މަސައްކަތްތަކެއް ކުރައްވާފައެވެ. އޭގެ ތެރޭގައި ފިހާރަފިހާރައިގެ ސޭޓްކަމާއި، މީހުންނަށް ބާޒާރު ކޮށްދިނުމާއި، ކުދިން ސުކޫލަށް ދެންގޮސްދިނުން ހިމެނެއެވެ.

ދޮންބެގެ ތަޢްލީމީ ޙަޔާތުގެ ކާމިޔާބީތަކަށް ބަލާއިރު ދޮންބެވަނީ އެޑްވާންސް ސެޓްފިކެޓް އިން ސެކަންޑަރީ އިސްލާމް ޓީޗިން އާއި ޑިޕްލޮމާ އިން ސެކަންޑަރީ އިސްލާމް ޓީޗިން މިދެ ކޯސް ހައްދަވައި ދެ ކޯހުންވެސް 3 ވަނަ ހޯއްދަވައިފައެވެ. އަދިވެސް ދޮންބެ ވަނީ ބެޗްލާ އޮފް ޓީޗިން ހޮނާސް، މިކޯސް ފުރިހަމަ ކުރައްވައި މި ކޯހުންވެސް 3 ވަނަ ހޯއްދަވައިފައެވެ. ދޮންބެ އިތުރު ކާމިޔާބީ ތަކުގެ ތެރޭގައި ސުކޫލުގައި ބޭއްވުނު ޤުރުއާން މުބާރާތްތަކުން ވަނަ ލިބުންވެސް ފާހަގަ ކޮށްލެވެއެވެ.

ތަޢްލީމީ ޙަޔާތް ނިންމެވުމަށްފަހު ދޮންބެ ވަނީ ޢަމަލީ މައިދާނާ ކުރިމަތި ލައްވައި އެތައް ގިން ޚިދުމަތްތަކެއް ރަށާއި ޤައުމަށް ކޮށްދެއްވާފައެވެ. ދޮންބެ އެއްމެ ކުރާ ހިތްވާ މަސައްކަތަކީ ތަޢްލީމު އުނގަންނައިދިނުން ކަމަށް ވުމާއެކު ދޮންބެގެ ޚިދުމަތްތައް އަޅުގަނޑުމެންނަށް ލިބިފައިވަނީ ތަޢްލީމީ ރޮނގުންނެވެ. މި ރޮނގުން އޭނާ ކުރައްވާފައިވާ ޚިދުމަތްތަކަށް ބަލާއިރު ، އޭނާ ވަނީ 1998 ވަނަ އަހަރު އިހަވަންދޫ މަދަރުސާގެ ވަގުތީ މުދައްރިސްކަމާއި، 1999 އަހަރު ހަމަ އެމަދަރުސާގެ އެސިސްޓެންޓް މުދައްރިސްކަމާއި، 2001 ވަނަ އަހަރުގެ އެ މަދަރުސާގެ އިސްލާމް މުދައްރިސްކަންވެސް ކުރައްވާފައެވެ. އަދި 2006 ވަނަ އަހަރު އިހަވަންދޫ މަދަރުސާގެ ސުޕަވައިޒަރު ކަމާއި، 2008 ވަނަ އަހަރު އެމަދަރުސާގެ ގުރޭޑް އޭޓްގެ ލީޑިން ޓީޗަރުގެ މަޤާމުވެސް ފުރުއްވާފައެވެ. މިހާރު ދޮންބެ އަކީ އިހަވަންދޫ މަދަރުސާގެ ކޮލިފައިޑް ލީޑިން ޓީޗަރެކެވެ.

މާލޭގައި ހުންނަވައިގެން ކޯސް ހެއްދެވިއިރު ދޮންބެވަނީ މާލޭގައިވެސް ބައެއް ވަޒީފާތައް އަދާކުރައްވާފައެވެ. އެގޮތުން 2009 ވަނައަހަރު ތާޖުއްދީނު ސުކޫލުގެ ގުރޭޑް އޭޓް ޓީޗަރުކަމާއި، ސެންޓަރ ފޮރ ކޮންޓިނިއިން އެޑިޔުކޭޝަން (cce) ގެ އިސްލާމް މުދައްރިސްކަމާއި އިސްލާމިކް މިނިސްޓްރީގެ ހުކުރުކުރާ އިމާމެއްގެ މަޤާމު ދޮންބެ ފުރުއްވާފައިވެއެވެ.

ދޮންބެގެ ދަރިވަރުން ދޮންބެ ސިފަކުރައްވަނީ ވަރަށް މަޖާ މިޒާޖެއްގެ ބޭފުޅެއްގެ ގޮތުގައެވެ. އެކުދިން ދޮންބެގެ ފިލާވަޅުތައް އަޑުއަހަނީ ޝައުޤުވެރިކަމާ އެކުގައެވެ. ކިޔަވައިދިނުމުގައި ދޮންބެ ގެންގުލޭ ތަފާތު މަޖާ އުކުޅުތައް އެކުދިންނަށް ކަމުދެއެވެ. ދޮންބެ ވަނީ އިހަވަންދޫ މަދަރުސާގެ ދަރިވަރުންނަށް ގިނަގުނަ ޚިދުމަތްތަކެއް ކޮށްދެއްވާފައެވެ. އެގޮތުން އިހަވަންދޫ މަދަރުސާގައި ގުރޭޑު 8 އުފެއްދުމަށްޓަކައި ވަރަށް ބުރަކޮށް މަސައްކަތް ކުރައްވާފައިވެއެވެ. އަދި 8 އުފެދުމާ ގުޅިގެން ދޮންބެ ވަނީ އެދަރިވަރުންނަށް ގިނަ މާއްދާތަކެއް ކިޔަވައި ދެއްވާފައެވެ. އޭގެ ތެރޭގައި އިސްލާމް، އިކޮނޮމިކްސް، އެކައުންޓް އަދި ފިޝަރީސް ސައިންސް ހިމެނެއެވެ. އިހަވަންދޫ މަދަރުސާގައި ގުރޭޑް 11 އަދި 12 އުފެއްދުމަށްޓަކައިވެސް އެއްމެ ބުރަކޮށް މަސައްކަތް ކުރެއްވި އެއް ބޭފުޅަކީ ދޮންބެއެވެ. މިކަން ކުރުމަށްޓަކައި ކުދިންގެ ނަތީޖާ ރަނގަޅުކުރުމަށް ބެލެނިވެރިންނާއި ދަރިވަރުންނަށް މަޝްވަރާ ދެއްވައި ރަށުން ބޭރުން އޭލެވެލް ކިޔެވުމަށް ކުދިން ގެނައުމަށް ކުރެވުނު ދަތުރުތަކުގައި ދޮންބެ ބައިވެރިވެ ވަޑައިގެންފައި ވެއެވެ.

އިހަވަންދޫ މަދަރުސާގެ ދަރިވަރުންގެ އަޚްލާޤާއި ކިޔެވުން ރަނގަޅު ކުރުމަށްޓަކައި ދޮންބެ ދަނީ އިޚްލާސްތެރި ކަމާއެކު މަސައްކަތް ކުރައްވަމުންނެވެ. އޭގެތެރޭގައި ޓީޗަރުންގެ ފިލާވަޅުތައް އޮބްޒާވް ކުރުމާއި ހައުސް ދަރިވަރުންނަށް ތަމްސީލް ދެއްވުމާއި ސުކޫލް މެނޭޖްމެންޓަށް ޚިޔާލާއި މަޝްވަރާ ދެއްވުން ހިމެނެއެވެ. އަދި ކަންތައްތައް ތަންފީޒު ކުރުމުގައި އިސްރީލެއް އަދާކުރައްވާކަން ހާއްސަގޮތެއްގައި ފާހަގަ ކޮށްލެވެއެވެ. 2001 ވަނަ އަހަރު ޒަވާޖީ ޙަޔާތެއް ފެއްޓެވި ދޮންބެ ކައިވެނީގެ ގޮތުން ގުޅިވަޑައިގެންނެވީ ހއ.އިހަވަންދޫ ފުނަމާގެ ޝަމީމާ އަބްދުއްސައްތާރާއިއެވެ. މިހާރު ދޮންބެއަށް ދެކުދިން ލިބިވަޑައިގެންފައިވާއިރު، ދޮންބެ އެއްމެ އުފާވީ މީގެ ތެރެއިން ދޮންބެގެ ދޮށީ ދަރިފުޅު އަދި އަންހެންދަރިފުޅު ކަމަށްވާ މާއިޝާ ލިބިވަޑައިގަތް ދުވަހުއެވެ. ދޮންބެ އެއްމެ ދެކެން ބޭނުންވާ ދުވަހަކީ އޭނާ ތަޤްވާވެރިއެއްގެ ގޮތުގައި ހުރެ އޭނާގެ އަނބި މީހާއާއި ދަރިންވެސް ތަޤްވާވެރި ބައެއްގެ ގޮތުގައި ވާނޭ ދުވަހެވެ.

އިސްލާމް ދީނުގެ ދައުވަތް ފެތުރެއްވުމަށް އެއްމެ ބޮޑަށް ޝައުޤުވެރިކަމެއް ހުންނަ ދޮންބެ ކިޔަވައި ކުދިންނަށް ކުރައްވާ އިލްތިމާސްއަކީ، އެއްވެސް ކުއްޖަކު އެއްވެސް ޙާލެއްގައި ކިޔެވުން ދޫކޮށްނުލައި، އުނގެނޭ ޢިލްމެއްގެ ބޭނުން އެއްމެ ހެޔޮގޮތުގައި ހިފައި މަރުވުމުގެ ކުރިން ފުރިހަމަ ތަޤްވާވެރިއަކަށްވެ އަދި މައިންބަފައިންނާއި އެހެން މީހުންނަށްވެސް އިޚްތިރާމްކުރާ އެމީހުންގެ ލޯބި ލިބިގެންވާ ބައެއްކަމުގައި ވުމަށެވެ.