2004 ވަނަ އަހަރުގެ ޑިސެމްބަރ މަހުގެ 26 ވަނަ ދުވަހު ރާއްޖެއަށް ކުރިމަތިވި ސުނާމީ ކާރިސާގެ ސަބަބުން ރާއްޖޭގެ ގިނަ ރަށްރަށުގެ ފަޅުތަކަށް ވަނީ ވަރަށް ބޮޑަށް ގެއްލުންވެ ހަލާކު ވެފައެވެ. މިގޮތުން ހއ.އިހަފަރަކީވެސް މިމައްސަލަ ކުރިމަތިވެފައިވާ ރަށެކެވެ. އެރަށުގެ ފަޅު މަރާމާތު ކުރުމުގެ މަސައްކަތް ސަޢޫދީ ސަރުކާރުގެ ހިލޭ އެހީގެ ދަށުން ފަށައިގެން ކުރިއަށް ގެންދަނިކޮށް ރަށުގެ ރައްޔިތުން ނުކުމެ މިމަސައްކަތް ވަނީ ހުއްޓުވާފައެވެ. މިއީ މިނިސްޓްރީ އޮފް ހައުސިންގެ ފަރާތުން މިމަސައްކަތް ހިނގައި ދިޔަގޮތް ތަހުޤީޤު ކުރުމަށްފަހު އެމިނިސްޓްރީގެ ރިސާޗް އޮފިސަރ ިޢާއިޝަތު ޤުރައިޝާ ލިޔާ ރިޕޯޓެކެވެ. މި ރިޕޯޓުގައި ހިމަނާފައި ވާނީ މި މަސައްކަތް ކުރިން ކޮށްފައިވާގޮތާއި، މަސައްކަތް ހުއްޓުވަން މެދުވެރިވި ސަބަބާއި، މިކަން ހިނގައިދިޔަގޮތާއި، މިކަމުގައި ޒިންމާ އުފުލަން ޖެހޭ ފަރާތްތަކާއި އަދި މި މައްސަލައިގެ ހައްލެވެ. މި ރިޕޯޓު އެކުލަވާލައިފައި މިވަނީ އިހަފަރުގެ ރައްޔިތުންނާއި، ރަށުގެ ކައުންސިލް އިދާރާއިންނާއި އަދި މިމަސައްކަތާއި ހަވާލުވި ކޮންސްޓްރަކްޝަން ކޮންޕެނީގެ ފަރާތުން ލިބުނު މައުލޫމާތުގެ އެހީގައެވެ.
ރަށުގެ ފަޅު މަރާމާތު ކުރުމުގެ މަސައްކަތް ކުރިން ކުރެވިފައިވާ ގޮތް
އިހަފަރު ފަޅު ފުންކުރުމުގެ މަސައްކަތް މީގެ ކުރިން ދެފަހަރެއްގެ މަތިން ކުރެވިފައިވެއެވެ. މި މަސައްކަތް ފުރަތަމަ ކުރެވުނީ 1990 ވަނަ އަހަރު ރައްޔިތުންގެ މާލިއްޔަތުން ޚަރަދުކޮށްގެން، ސީދާ ރައްޔިތުންގެ ބެލުމުގެ ދަށުންނެވެ. 2000 ވަނަ އަހަރު އަލުން މިމަސައްކަތް ކުރަން ޖެހުނީ މޫސުމީ ބަދަލުތަކާއި އުދަ އެރުމާއި ގުޅިގެން ފަޅަށް ބޮޑެތި ގެއްލުންތަކެއް ލިބުމުގެ ސަބަބުންނެވެ. މި ދެފަހަރުވެސް މިމަސައްކަތް ކުރެވުނީ މަސައްކަތާ ހަވާލުވި ފަރާތުން ރައްޔިތުންގެ ލަފާ ހޯއްދަވައިގެން،ސަރުކާރުގެ ބެއްލެވުމުގެ ދަށުންނެވެ.
ކަން ހިނގައިދިޔަގޮތް
އިހަފަރު ފަޅު މަރާމާތު ކުރުމުގެ މަސައްކަތް ސަރުކާރުން ހަވާލު ކުރައްވާފައިވަނީ އުވަދޯނި ކޮންސްޓްރަކްޝަނާއެވެ. އެބޭފުޅުންނާއި ހަވާލުކުރެވުނު މަސައްކަތްތަކުގެ ތެރޭގައި ފަޅު ފުންކުރުމާއި، ފަޅު ބޮޑުކޮށް، ފަޅާއި ގުޅުން ހުރި ވެލިގަނޑު ހިމާޔަތް ކުރުމައްޓަކައި ފަޅުގެ ދެފަރާތުން ރިވެޓްްމެންޓް ޖެހުމުގެ މަސައްކަތް ހިމެނެއެވެ. އެބޭފުޅުން މިމަސައްކަތް ކުރައްވަމުން ގެންދެވީ މާބޮޑު ފަރުވާތެރިކަމެއް ނުބަހައްޓައި ތިމާވެއްޓަށް ބެއްލެވުމެއްނެތި، ބާރު ދުވެއްޔެއްގައެވެ. މިކަމާ ހިތްހަމަ ނުޖެހިގެން ރައްޔިތުން ނުކުމެ މިމަސައްކަތް ހުއްޓުވީއެވެ.
ކަން ހިނގަން މެދުވެރިވި ސަބަބު
މިފަދަ ބޮޑު މަސައްކަތެއް ކުރަން ފެށުމުގެ ކުރިން ރަށުގެ ރައްޔިތުންނާއި، މަދަނީ ޖަމާޢަތްތަކާއި، ކޮމެޓީތަކުގެ ޚިޔާލާއި ލަފާ ހޯއްދަވައި، އެބޭފުޅުން ބޭނުންފުޅުވާ ގޮތަކީ ކޮބައިތޯ ބައްލަވަން ޖެހޭނެއެވެ. އުވަދޯނި ކޮންސްޓްރަކްޝަންއިން މިކަން ފެއްޓެވެމުގެ ކުރިން މިއިން ފަރާތަކާއި މަޝްވަރާ ކުރައްވާފައެއް ނުވެއެވެ. މިރަށަކީ ސިޔާސީ ބައިބައިވުން އުފެދިފައިވާ ރަށެއްކަމުން، މިކަން ފެއްޓެވުމަށްޓަކައި، ރައްޔިތުންގެ ޚިޔާލު ހޯއްދެވުމަށް، ރަށުގެ ދާއިރާގެ މެމްބަރ އަލްފާޟިލް ޤާސިމް ނަޝީދު ބޭއްވެވި ބައްދަލުވުމަށް ވަޑައިގެންނެވީ، އެމަނިކުފާނު ނިސްބަތްވެވަޑައިގަންނަވާ ޕާޓީގެ 50 މެމްބަރުން އެކަންޏެވެ. މީގެ އިތުރުން ރަށު ކައުންސިލުން، މިމަސައްކަތާއި ގުޅޭގޮތުން ރައްޔިތުންގެ ޚިޔާލު ހޯއްދެވުމަށް އެކިފަހަރުމަތިން ރައްޔިތުންނަށް ދެންނެވުމުން އެކަމަށް ޢިޖާބަދެއްވީ މަދު ރައްޔިތުންތަކެކެވެ. އަދި މިމަސައްކަތާއި ގުޅޭގޮތުން ޚިޔާލު ފާޅު ކޮށްފައިވަނީ ރަށުގެ ފަތިފުށް ޖަމިއްޔާއިން އެކަންޏެވެ.
މިކަމުގައި ޒިންމާ އުފުލަންޖެހޭ ފަރާތްތައް
އުވަދޯނި ކޮންސްޓްރަކްޝަންއިންް މިމަސައްކަތް ފައްޓަވާފައި ވަނީ ރައްޔިތުންގެ އެއްވެސް ޚިޔާލެއް ނުހޯއްދަވައިކަމުން އެބޭފުޅުންވެސް މިކަމުގެ ޒިންމާ ނަންގަވަން ޖެހެއެވެ. ޚާއްސަކޮށް ރަށުގެ ރައްޔިތުން މިކަމުގެ ޒިންމާ ނަންގަވަން ޖެހެއެވެ. ސަބަބަކީ އިހަފަރު ދާއިރާގެ މެމްބަރ ބޭއްވެވި ބައްދަލުވުމަށާއި، ރަށު ކައުންސިލުން ބޭއްވެވި ބައްދަލުވުންތަކަށް އެބޭފުޅުން އެއްބާރުލެއްވުން ދެއްވާފައެއް ނުވެއެވެ. އަދި ރަށުގެ މަދަނީ ޖަމިއްޔާތަކާއި ކޮމެޓީތައްވެސް މިކަމުގައި އިހުމާލުވެފައިވަނީ ރައްޔިތުންނެކޭ އެއްފަދައިންނެވެ.
މައްސަލައިގެ ހައްލު
ފަޅު ފުންކުރުމާއި ބަނދަރު ހެދުމުގެ މަސައްކަތްތަކަކީ ރައްޔިތުންނާއި ގުޅިފައިވާ ކަންކަމެވެ. އެހެންކަމުން މިފަދަ ކަންކަން ކުރަން ފެށުމުގެ ކުރިން ސަރުކާރުންވެސް އަދި މަސައްކަތާއި ހަވާލުވާ ފަރާތުންވެސް އެރަށެއްގެ ރައްޔިތުންނާއި މަދަނީ ޖަމިއްޔާތަކުގެ ޚިޔާލާއި މަޝްވަރާ ހޯއްދަވަން ވާނެއެވެ. އިހަފަރަށް ކުރިމަތިވި މިމައްސަލައިގެ ހައްލަކީ، ސިޔާސީ ރޫޙަށްވުރެ އިޖުތިމާއީ ރޫޙު ކުރިޔަށް ނެރެ ރައްޔިތުން އެއްބައިވެ މިމަސައްކަތާއި މެދު ޚިޔާލު ބަދަލުކޮށް އެންމެން އެއްބަސްވާ އެންމެ ރަނގަޅު ގޮތަކަށް މަސައްކަތް ކުރިޔަށް ގެންދިޔުމެވެ.
No comments :
Post a Comment