ޅެން ޝަރަހަ

ފަހު ދަތުރު

ބަލާ އަންނާނެ ވަގުތެއް ނޭނގެޔޭ ދަތުރަށް ހަދަން ތިއްބާ

ސަލާމަތްވާނެ މަގުފެނި ނުހިނގިފައި އެމަގުން މިހެން ތިއްބާ

ޤަރާރުކަމެއް ނުވާ މަސްރަޙުގެ މުއްދަތު ހަމަވެ ނިމިދާނޭ

ޢަރާމު އުފަލުގައި ދުނިޔޭގެ އުނގުގައި ބަލަ ނިދަން ތިއްބާ

މަދަދު އެދި ފަށްފަށުން އެތަކެއް ދިމާއަށް ނަޡަރު ހިންގާފައި

ޢަދަދު ނުވެވޭ ޚިޔާލުތަކުން ސަލާމަތް ނުވެވިފައި ތިއްބާ

އެގޮތް ރަނގަޅޭ މިގޮތް ނުބައޭ މިހެން ހީކޮށް ކަމެއްނުވެފައި

އެގޮތް މިގޮތަށް އެފުށް މިފުށަށްޖެހެން ގޮތް ހުސްވެފައި ތިއްބާ

ބަޔާނެއް ނުވެވިފައި މިލިބޭ އުދާހެއް ދުންޔަވީ އުނގުގައި

ޙަޔާތުގެ މަގުމަތީ ގޮތްހުސްވެގެން ދެކޮޅަށް ބަލަން ތިއްބާ

                (ރީތި ޅެން 9)

ސަލާމަތްވާނެ މަގުފެނި އެމަގުން ނުހިނގިފައި ދަތުރަށް ހަދަން ތިއްބާ ބަލާއަންނާނޭ ވަގުތެއް 

ނޭނގޭނެއެވެ. ދާއިމުވުމެއް ނުވާ މިދުނިޔޭގެ މުއްދަތު، ޢަރާމު އުފަލުގައި  ނިދަން ތިއްބާ ހަމަވެ ނިމިދާނެއެވެ. ފަށްފަށުން މަދަދު އެދި އެތަކެއް ދިމާއަށް ނަޒަރު ހިންގާފައި އެތަކެއް ހިޔާލުތަކަކުން ސަލާމަތްނުވެވިފައި ތިއްބާ ޢަޖަލު ޖެހިދާނެއެވެ. އެގޮތް ރަނގަޅޭ މިގޮތް ނުބައޭ ހީކޮށް ކަމެއް ނުވެވިފައި ތިއްބާ  އެފުށްމިފުށަށް ޖެހިދާނެއެވެ. ދުނިޔޭގައި ލިބޭ ޢުދާސްތައް ބަޔާންނުވެވިފައި ހަޔާތުގެ މަގުމަތީ ދެކޮޅަށް ބަލަން ތިއްބާ މަރު އައިސް ޖެހިދާނެއެވެ. ޅެންވެރިޔާ މިޅެމުގައި ބުނަން ބޭނުންވާ ވާހަކަ އަކީ ދުނިޔެއަކީ ވަގުތީ ތަނެއް ކަމާއި ކޮންމެ ވަގުތަކުވެސް މަރުވެދާނެ ކަމެވެ. ތިމާގެ ނަފުސު  ފަހުން އިސްލާހު ކުރަން ހުއްޓައި ޢަޖަލު އައިސް ޖެހިދާނެ ވާހަކައެވެ. މިސާލަކަށް ސުނާމީއާއި އެކިއެކި ކާރިސާ ތަކުގައި އެތަކެއް ޒުވާނުން ވެސް ވަނީ މަރާ ކުރިމަތިލާފައެވެ.